Nákkáhallandilálašvuhtii ráhkkaneapmi

Geahččaladdanlogaldallan

Árvvoštallankomitea buktá geahččaladdanlogaldallama bajilčállaga. Geahččaladdanlogaldallama ulbmilin lea iskat sihke kandidáhta návcca guorahallat fáttá mas ii leat njuolggo oktavuohta nákkosgirjái, ja návcca gaskkustit dieđuid logaldallandilálašvuođas. Geahččaladdanlogaldallama fáddá almmuhuvvo doavttirgrádakandidáhttii unnimustá logi (10) bargobeaivvi ovdal logaldallama. Komitea jođiheaddji sádde dieđu dán birra hálddahussii, mii sádde viidáseappot kandidáhttii.

Árvvoštallankomitea formálalaš nammadeami rájes gitta geahččaladdanlogaldallama ja nákkáhallama rádjái ii berre leat oktavuohta gaskal kandidáhta ja árvvoštallankomitea miellahtuid. Kandidáhtta sáhttá vejolaččat digaštallat komitea cealkámuša ja dan dulkoma bagadalliiguin. Lea kandidáhta iežas bargu dulkot geahččaladdanlogaldallama fáttá  ja válljet iežas lahkoneami addojuvvon bajilčállaga dulkonvejolašvuođaid vuođul. Kandidáhtta sáhttá spiehkastahkan, jus lea erenoamáš eahpesihkar logaldallama fáttás, jearrat komitea jođiheaddjis lea go mihkke erenoamážiid maid komitea háliida ságaškuššojuvvot. Kandidáhtta ii galgga geahččaladdanlogaldallamis atnit áiggi ovdanbuktit nákkosgirjji bohtosiid. Nákkáhallama álggus lea dasa várrejuvvon áigi (gč. láhkaásahusa § 20-2).

Geahččaladdanlogaldallan lea 45 minuhta. Kandidáhtta sáhttá atnit logaldallamis audiovisuála veahkkeneavvuid (omd. Powerpoint-čájáhusa).

Maŋŋil geahččaladdanlogallama árvvoštallankomitea doallá čoahkkima mas mearrida dohkkehuvvogo geahččaladdanlogaldallan vai ii.

Sámi allaskuvla sáhttá šiehttat kandidáhtain ahte streamejuvvogo geahččaladdanlogaldallan ja nákkáhallan. Suinna šihttojuvvo maiddái galgágo streama báddejuvvot ja vurkejuvvot Sámi allaskuvlla arkiivii.

Nákkáhallan

Nákkáhallama lágida hálddahuslaččat dutkanhálddahus. Go lea mearriduvvon ahte šaddá nákkáhallan, de válljejuvvo hálddahuslaš koordináhtor hálddahusas gii pláne ja ordne nákkáhallanlágideami praktihkalaš beliid. Kandidáhtta maid oažžu dieđu go hálddahuslaš koordináhtor lea nammaduvvon. Nákkáhallan lea allaárvosaš dilálašvuohta, ja nákkáhallama jođiheaddji, opponeanttat ja kandidáhtta leat čáppat gárvodan, ja nákkáhallansáles lea maiddái nákkáhallandilálašvuhtii sohppojuvvon čiŋaheapmi.

Nákkáhallama jođiha dábálaččat DOS-jođiheaddji dahje son gean DOS fápmuda dasa (gč. láhkaásahusa § 20-2). Nákkáhallandilálašvuohta álgá prosešuvnnain, mas nákkáhallama jođiheaddji láide  prosešuvnna nákkáhallanlatnjii. Su čuvvot doavttirgrádastudeanta (nákkáhalli), vuosttaš opponeanta, nubbi opponeanta ja goalmmát opponeanta, gii lea maid komitea jođiheaddji. Vurdojuvvo ahte guldaleaddjit leat juo sáles ja sii čuožžilit go prosešuvdna boahtá sisa.  Go prosešuvdna lea boahtán sálii, de čohkkedit doavttirgrádastudeanta ja komitealahtut sidjiide várrejuvvon sajiide.

Nákkáhallama jođiheaddji doallá álggahansártni mas son čilge oppalaččat gii nákkáhallá, nákkosgirjji fáttá ja geahččaladdanlogaldallama sisaaddima ja árvvoštallama. Dan maŋŋel doavttirgrádastudeanta doallá sárdnestuolus 15 minuhta guhkkosaš sáhkavuoru iežas dutkanbarggu ulbmila, dutkanmateriála, teorehtalaš lahkonanvugiid ja dutkanbohtosiid birra. Sáhkavuoru ulbmilin lea čilget nákkosgirjji guovddáš beliid guldaleddjiide, ja nákkáhalli sáhttá atnit audiovisuála veahkkeneavvuid (omd. Powerpoint-čájáhusa). Jus ovdamearkka dihte PowerPoint adnojuvvo sáhkavuorus, de dat rahppo gárvvisin čájeheapmái ovdal go nákkáhallandilálašvuohta álgá, ja álggahansiidui biddjojit dieđut nákkosgirjji ja nákkáhalli birra.   

Nákkáhalli sáhkavuoru maŋŋel nákkáhallanjođiheaddji bovde doavttirgrádastudeantta ja vuosttaš opponeantta ovddabeallái nákkáhallat (omd. lávddi ala). Opponeanta ja doavttirgrádastudeanta čohkkába ságastallama áigge nu ahte soai oaidniba nubbi nuppi bures, muhto sudno ámadajut galget maiddái leat oidnosis guldaleddjiide.

Vuosttaš opponeanta álggaha nákkáhallanságastallama. Sámi allaskuvla lea addán rávvejeaddji áiggi vuosttaš opponeantta ságastallamii gitta beannot (1,5) diimmu rádjai. Nubbi opponeanta loahpaha nákkáhallama, ja dán ságastallama rávvejeaddji guhkodat lea gitta ovtta (1) diimmu rádjái. Mii guoská opponeanttaid kommentáraid sisdollui, de leaba soai ovddalgihtii šiehttan gaskkaneaskka goabbá váldá bajás maid nákkáhallamis. Komiteacealkámuš sáhttá maid čujuhit relevánta temáide mat nákkáhallamis sáhttet boahtit bajás.

Vuosttaš opponeanta sáhkavuoru maŋŋel dollojuvvo boddu. Eará guldaleaddjit geat háliidit opponeret ex auditorio galget bottu áigge addit dieđu dán birra nákkáhallama jođiheaddjái. Nákkáhallanjođiheaddji almmuha dán nákkáhallama álgosáhkavuorustis. Ex auditorio -opponeren lea nákkáhallandilálašvuođa loahpas.

Go opponeanttat ja vejolaš ex auditorio -opponeanttat leat geargan de nákkáhallanjođiheaddji loahpaha nákkáhallandilálašvuođa.

Láhkaásahusa § 20-2 mielde nákkáhallandilálašvuođa maŋŋá addá árvvoštallankomitea ásahussii čilgehusa, mo dat lea árvvoštallan nákkosgirjji bealušteami. Čilgehusas lea konklušuvdna das leago nákkáhallan dohkkehuvvon vai ii. Opponeanttaid oainnut deattuhuvvojit árvvoštallamis. Čilgehusa ferte vuođuštit jus nákkáhallan ii dohkkehuvvo.

Láhkaásahusas §21-1 čuožžu ahte jus Sámi allaskuvla ii dohkket nákkáhallama, de sáhttá doavttirgrádakandidáhtta bealuštit nákkosgirjjis ođđasis. Ođđa nákkáhallama sáhttá doallat áramustá guhtta mánu maŋŋá, ja nu guhkás go vejolaš, berre álgoálgosaš árvvoštallankomitea árvvoštallat dan, jus Sámi allaskuvla ii mearrit eará.