Sámi allaskuvla rabas fas maŋŋel koronagiddema

Geassemánu 15. beaivvi rájes lea Sámi allaskuvla fas rabas maŋŋil go lea leamaš giddejuvvon moadde mánu koronadávdda njoammuma eastadeami dihte.

Oahpojagi álgin lea Diehtosiiddas
Ođđa oahppojagi álggaheapmi čađahuvvo fysalaččat Diehtosiiddas borgemánu 24. beaivvi rájes. Álggahanvahku prográmma almmuhuvvo sierra. Maiddái 2020-giđa loahpahandoalut mat dábálaččat livčče galgan geassemánus, lágiduvvojit borgemánu loahpageahčen.

Sámi allaskuvla čađaha eanas doaimmaid fysalaččat Diehtosiiddas 34. vahku rájes. Dás oainnát goas iešguđet oahpuin lea álgindáhton : https://samas.no/se/a/oahpuid-algimat-2020-cavcca. Oahpahus čađahuvvo nu go lea oahppoplánaide biddjojuvvon. Allaskuvla dárkkista geažos áiggi gustovaš njoammuneastadannjuolggadusaid vai lágideamit sáhttet čađahuvvot oadjebas lági mielde. Eambbo dieđut gávdnojit koronavirus čuoggá vuolde min neahttasiiddus.

Digitála lágideamit
Eanaš lágideamit lágiduvvojit maid digitálalaččat, nu ahte daid sáhttá neahta bokte maid čuovvut jus iešguđet sivaid geažil ii beasa oahppobáikái. Čujuhusat biddjojuvvojit "Dáhpáhusaid" vuollái neahttasiiddus.

Deháleamos njoammuneastandoaimmat máid buohkat galget čuovvut, leat:

1. Buohcan ja erren

• Jus leat buohcci dahje illáveaje, de galggat orrut ruovttus.
• Jus leat erremis, de it galgga boahtit Diehtosiidii.

2. Ráinnasvuohta

• Basa gieđaid dávjá loika sáibočázis. Jus ii leat čáhci, geavat giehtasprihta.
• Gastit ja gossat galgá njunnebáhpira sisa máid bálkestat, dahje jus ii leat bábir, de giehtagávvii.
• Basa gieđaid ovdal go guoskkahat ámadaju ja ovdal go boradat.

3. Doalat gaskka eará olbmuide

• Doalat unnimusat mehtera gaskka nuppi olbmui juohke sajis.

Dilli sáhttá fáhkkestaga rievdat, ja nu maiddái doaibmabijut. Dan birra dieđihit neahttasiiddus koronadieđuid vuolde.