BA - Prográmma

JOU Sámi journalistihka bachelorprográmma

Bilde av journalist masterstudenter

Journalistta studeanttat Johan Ante Utsi, Imani Altemus-Williams ja Nils Johan Eira. Saara Jaana Lavi govven.

Šatta sámi journalistan!

  • Bacheloroahppu- golbma jagi ollesáiggis
  • 180 oahppočuoggá
  • Sisaváldingáibádusat: Oppalaš lohkangelbbolašvuohta dahje reálagelbbolašvuohta ja sámegielladuogáš
  • Vejolašvuohta čiekŋudit álgoálbmotjournalistihkkii
  • Prográmmaplána 
     

Boađe fal lohkat journalistihka!

Dihtetgo don ahte journalisttain lea mearehis miellagiddevaš bargu? Bargobeaivvit leat girjái, álo ođđa vuorddekeahtes hástalusat. Ferte vuolgit, álo mannat dohko gos dáhpáhuvvá ja beasat de ollu olbmuiguin gávnnadit.  Journalisttaid eallin lea johtin. 

Sámi mediaásahusat dárbbašit du gelbbolašvuođa ja hutkáivuođa.  

Oahpat viššalit snuoggat ja šattat čeahppi čállit ja áŋgir filbmet dahje govvet. Šattat earenoamáš čeahppi geavahit sosiála mediaid ja ráhkadit filmmaid.

Dákkárat leat min fágat:

  • Ođasjournalistihkka
  • Sosiála mediat ja hui ollu filbmen (ođđa fálaldat)
  • Filbmaoahppu (ođđa fálaldat)
  • Featurejournalistihkka
  • Árktalaš servodaga hástalusat (servodatfága- ođđa fálaldat)
  • Giellagáhtten
  • Álgoálbmot journalistihkka
  • Guorahalli journalistihkka

Beasat nai vuolgit olgoriikii studeret, mis leat buorit lonohallan prográmmat.

Sámi journalistihka bacheloroahppu bistá golbma jagi. Bachelorgráda sáhttá leat journalistihka mastergrádii vuođđun.
 

Bargovejolašvuođat

Sámis leat ollu mediafitnodagat, ja Sámi allaskuvlla journalistaoahppu addá dutnje gelbbolašvuođa bargat journalistan sihke sámi ja riikka mediain. Don sáhtát maid álggahit iežat mediafitnodaga, mii vuovdá reportášaid iešguđetlágan mediaide. Oahppu addá maid dutnje vuođu bargat diehtojuohkkin almmolaš ásahusain dahje fitnodagain.


 

 

Sisabeassangáibádusat

  • Oppalaš lohkangelbbolašvuohta dahje reálagelbbolašvuohta ja sámegielmáhttu.
  • Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje guhkes amasgielladutkkus ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.