PhD - Sierra kursa

SÁM401 Etihkka, eamiálbmotdiehtu ja -metodologiija

Oahppoovttadaga hálddaša Giela, duoji, boazodoalu ja servodatdiehtagiid goahti.

Studerenbáiki: Sámi allaskuvla

Oahpahusgiella: Sámegiella ja eaŋgalasgiella

Viidodat: 10 oč.

Oahpahusvahkkut: 3, 5, 7, 9

 

Oanehaččat oahppofáttá birra

Oahppu fállá teorehtalaš geahčastaga, mainna lágiin eamiálbmotdiehtu leat čatnagasas kolonialisttalaš ja dekolonialisttalaš diskurssaide ja mo sámedutkan lea oassi dán konteavsttas. Oahpus guorahallojit eamiálbmotdutkamiid guoski dutkanehtalaš ja -metodalaš gažaldagat govda, riikkaidgaskasaš perspektiivvas humanisttalaš ja servodatdiehtagiin. Oahpus suokkardallo eamiálbmogiid iežaset searvan dieđu buvttadeapmái ja dutkanmetodaid ovdánahttimii, ja mo dát leat nuppástuhttán dieđalaš paradigmaid.
 

Maid don oahpat?

Oahpu maŋŋá don

  • basttát buohtastahttit eamiálbmotmetodologiija ja oarjemáilmmi dutkanárbevieruid ja dovddat daid erohusaid ja ovttaláganvuođaid
  • máhtát ságastallat teorehtalaš ja filosofalaš gažaldagain, mat gusket eamiálbmotmetodologiijaide ja etihkkii iežat fágasuorggis
  • máhtát kritihkalaččat guorahallat, makkár váikkuhus teoriija ja metoda válljemis lea dutkanfáttá guorahallamii
  • máhtát suokkardit eamiálbmotmetodologiija heivvolašvuođa iežat dutkansuorggi  dutkamii ja teorehtalaš doahpagiid geavaheapmái
  • máhtát iehčanassii plánet heivvolaš čuolmma esseija fáddán, mas guorahalat eamiálbmotdihtui, -metodologiijai ja/dahje dutkanetihkkii guoski teorehtalaš gažaldaga

 

Oahpahus- ja oahppanvuogit

Logaldallamat, ságastallamat ja seminárat. Ovdabargun galgá lohkat artihkkala, man vuođul addojuvvo e-forumbargu. Gáibiduvvo, ahte studeanttat servet aktiivvalaččat logaldallamiidda ja semináraide.

 

Sisabeassangáibádusat ja almmuheapmi

Sisa besset sámegiela ja sámi girjjálašvuođa doavttirgrádastudeanttat ja studeanttat, geain lea vástideaddji studerengelbbolašvuohta.

Diehtu sisabeassamis sáddejuvvo e-poasttain 1-2 vahku ohcanáigemeari maŋŋá.

 

Eksámen

Čálus man guhkkodat lea 10–12 siiddu ja mii guorahallá eamiálbmotdihtui, -metodologiijai ja/dahje dutkanetihkkii guoski teorehtalaš gažaldaga lohkanmeari vuođul.

Bargu árvvoštallojuvvo oahppanjoksosiid ektui. Eksámenbarggu sisaaddin: 22.03.2019. Árvosátni: Ceavzán / Ii ceavzán.

 

Oahpahusa árvvoštallan

Mii ávžžuhit studeanttaid árvvoštallat oahpu vai máhttit buoridit iežamet fálaldagaid. Sámi allaskuvllas lea kvalitehtasihkkarastinvuogádat, mainna sáhttá árvvoštallat ásahusa oahppofálaldagaid ja bálvalusaid.

 

Lohkanmearri

Geahča Sámegiela ja sámi girjjálašvuođa doavttirgráda prográmmaplána

 

Goas ja mo ozat ohppui?

Ohcanáigemearri: 01.12.2018.

Raba ohcanskovi dás: Etihkka, eamiálbmotdiehtu ja -metodologiija

 

Sisabeassangáibádusat

Sisa besset sámegiela ja sámi girjjálašvuođa doavttirgrádastudeanttat ja studeanttat, geain lea vástideaddji studerengelbbolašvuohta.

Diehtu sisabeassamis sáddejuvvo e-poasttain 1-2 vahku ohcanáigemeari maŋŋá.

Koordinator

antea's picture
Aikio, Ante
E-mail: 
Ante.Aikio@samiskhs.no