PhD - Sierra kursa

SÁM402 Akademalaš čállin sámegillii

Oahppoovttadaga hálddaša Giela, duoji, boazodoalu ja servodatdiehtagiid goahti.

Studerenbáiki: Sámi allaskuvla

Oahpahusgiella: Sámegiella

Viidodat: 5 oč.

Oahpahusvahkkut: 35, 38, 41

 

Oanehaččat oahppofáttá birra

Veahkehit ja movttiidahttit čállit nákkosgirjji sámegillii hárjehusaid ja bagadallama vehkiin. Oahpu vuođđun leat teakstateoriijat, argumenteren ja dieđalaš čállinšlája árbevierut humanisttalaš dutkamis, ja studeanta oahpásmuvvá humanisttalaš dieđasuorggi artihkkaliid ja monografiijaid struktuvrraide. Studeanttat maiddái oahpásmuvvet dieđalaš publiserenvuogádahkii, teavsttaid stiila- ja sisdoallogáibádusaide ja formála iešvuođaide logaldallamiid, hárjehusaid ja lohkamušaid vehkiin. Dasa lassin čállinkursa oahpásnuhttá fágaterminologiija ráhkadeapmái. Oahpus suokkardallojit maiddái akademalaš sámegiela iešvuođat kontrastiiva ja gielladikšunperspektiivvas.

 

Maid don oahpat?

Oahpu maŋŋá don

- dovddat dieđalaš čállima váldoprinsihpaid ja máhtát heivehit daid iežas čállimii

- máhtát hábmet dutkančuolmma ja heivvolaš dutkanvuođu iežat čállinbargui

- máhtát gávdnat ja heivvolaš girjjálašvuođa iežat dutkančuolmma vuođul

- máhtát váldit vuostá veahki ja veahkehit mielstudeanttaid čállinproseassa áigge

- máhtát argumenteret, ja čállit čielga, kohereantta ja logihkalaš, iežat fágasuorggi teavstta

- máhtát ovddidit iežas fágasuorggi sámegiel terminologiija

- máhtát guorahallat akademalaš sámegiela iešvuođaid kontrastiiva ja gielladikšunperspektiivvas

 

Oahpahus- ja oahppanvuogit

Logaldallamat ja čállinseminárat. Oahppu sisttisdoallá golbma čállin- ja suokkardallanseminára, main studeanta hárjehallá hábmet ja ráddjet dutkangažaldagaid, geavahit proseassačállinvuogi oktagaslaš dutkangažaldaga hábmemis ja teavsttaid ráhkadeamis. Čállinseminárat ordnejuvvojit progrešuvnnalaččat nákkosgirjji čállima sierra muttuin. Kurssas leat golbma geatnegahtton  čállinseminára. Gáibiduvvo, ahte studeanttat servet aktiivvalaččat logaldallamiidda ja semináraide.
 

Sisabeassangáibádusat ja almmuheapmi

Sisa besset sámegiela ja sámi girjjálašvuođa doavttirgrádastudeanttat ja studeanttat, geain lea vástideaddji studerengelbbolašvuohta.

Diehtu sisabeassamis sáddejuvvo e-poasttain 1-2 vahku ohcanáigemeari maŋŋá.

 

Eksámen

Máhppaeksámen, mii sisttisdoallá golbma (3) seminárabarggu. Ovttaskas barggu guhkkodat lea 2–4 siiddu. Bargu árvvoštallojuvvo oahppanjoksosiid ektui. Eksámenmáhpa sisaaddin: 02.11.2018. Árvosátni: Ceavzán / Ii ceavzán

 

Oahpahusa árvvoštallan

Mii ávžžuhit studeanttaid árvvoštallat oahpu vai máhttit buoridit iežamet fálaldagaid. Sámi allaskuvllas lea kvalitehtasihkkarastinvuogádat, mainna sáhttá árvvoštallat ásahusa oahppofálaldagaid ja bálvalusaid.

 

Lohkanmearri

Lohkanmearri válljejuvvo dán listtus, muhto studeanta sáhttá maiddái evttohit eará girjjálašvuođa:

Björk, Lennart & Räisänen, Christine 1997: Research Papers in the Humanities: Linguistics. – Lennart Björk & Christine Räisänen, Academic Writing. Lund: Studentlitteratur. 271–298.

Herzberg, Frøydis 2000: Å få forskeren i tale. Artikkelinnledningen som retorisk strategi. – Øivin Andersen, Kjersti Fløttum & Torodd Kinn (doaimm.), Menneske, språk og felleskap. Oslo: Novus. 87–106.

Alley, Michael 1996: The Craft of Scientific Writing. 3rd edition. New York: Springer-Verlag.

Brodersen, Randi Bendikte & Bråten, Frederik Jebsen & Reiersgaard, Anders & Slethei, Kolbjørn & Ågotnes, Knut 2007: Tekstens autoritet. Tekstanalyse og skriving i akademia. Oslo: Universitetsforlag.

Kinnunen, Merja & Löytty, Olli (doaimm.) 2002: Tieteellinen kirjoittaminen. Tampere: Tammer-Paino.

Strannegård, Lars (doaimm.) 2003: Avhandlingen. Om att formas till forskare. Lund: Studentlitteratur.

 

Goas ja mo ozat ohppui?

Ohcanáigemearri lea 15.04.2018.

Raba ohcanskovi dás: Akademalaš čállin.

 

 

 

Sisabeassangáibádusat

Sisa besset sámegiela ja sámi girjjálašvuođa doavttirgrádastudeanttat ja studeanttat, geain lea vástideaddji studerengelbbolašvuohta.

Diehtu sisabeassamis sáddejuvvo e-poasttain 1-2 vahku ohcanáigemeari maŋŋá.

Koordinator

Aikio, Ante
E-mail: 
Ante.Aikio@samiskhs.no