Obbalaš bagadusat

(Ođastuvvon ođđajagimánu 7.b. 2021)

Norgga ráđđehus lea ođđajagimánu 3. beaivvi ja 4. beaivvi mearridan ođđa njoammuneastadandoaimmaid, vai lea dárkkistus koronadilálašvuođas ja vai njoammun ii beasa leavvat viidát. Doaibmabijut leat guhkiduvvon beivviin, ja gustojit gaskaboddosaččat badjel guokte vahkku, ođđajagimánu 4. beaivvi rájes gitta ođđajagimánnui 19. beaivvi rádjái.

  • Váldoávžžuhus lea ahte olbmot eai galgga guossástallat. Vuordde 14 beaivvi ovdal go finat guossis. Dat ii gusto dárbbašlaš ruovttubálválussii ja jus galggat gálledit olbmo gii lea jápminseaŋggas. Sii geat orrot okto sáhttet guossástallat gaskal ovtta ja guokte fásta olbmo luhtte dahje ovtta joavkku/bearraša luhtte geat orrot ovtta viesus/ásodagas. Mánáidgárdemánát ja mánáidskuvlamánát sáhttet guossástallat singuin geat leat ovtta kohorttas (joavkkus).  

Allaskuvla dárkkista geažos áiggi gustovaš njoammuneastadannjuolggadusaid vai lágideamit sáhttet čađahuvvot. Studeanttain ja bargiin lea ovddasvástás diehtit makkár njoammuneastadandoaibmabijut gustojit Diehtosiiddas vai mii sáhttit oahpuid ja bargguid čađahit.

Oahpahusat ja lágideamit 
Buot Sámi allaskuvlla logaldallamat čađahuvvojit digitálalaččat ođđajagimánu 18. beaivvi rádjái.

Diehtosiida
Ođđajagimánu 5. b. gitta ođđajagimánu 19. b. lea Diehtosiida rabas dušše studeanttaide ja bargiide. Studeanttat ja bargit fertejit atnit čoavddakoartta go galget beassat Diehtosiidii. 

Deháleamos njoammuneastandoaimmat:

1. Buohcan ja erren (geahča errenbagadusa dás vuollelis)

  • Jus leat buohcci dahje illáveaje, de galggat orrut ruovttus.
  • Jus leat erremis, de it galgga boahtit Diehtosiidii.

2. Ráinnasvuohta

  • Basa gieđaid dávjá ja dárkilit loika sáibočázis. Jus ii leat čáhci, geavat giehtasprihta.
  • Gastit ja gossat galgá njunnebáhpira sisa máid bálkestat, dahje jus ii leat bábir, de giehtagávvii.
  • Basa gieđaid ovdal go guoskkahat ámadaju ja ovdal go boradat.

3. Doalat gaskka eará olbmuide

Dilli sáhttá fáhkkestaga rievdat, ja nu maiddái doaibmabijut. Dan birra dieđihit dáppe neahttasiiddus.

4. Mátkkošteapmi

Ávžžuhit buot bargiid ja studeanttaid garvit dárbbašmeahttun mátkkiid.

Buohkat geat bohtet Norgii dakkár guovllus máid Norgga ráđđehus lea merken ruoksadin ja fiskadin kárttas, sii galget 10 beaivvi erremii go bohtet Norgii. 

Errennjuolggadusat

Dus lea alddát ovddasvástádus čuovvut mielde makkár njuolggadusat gustojit áiggis áigái. Mii rávvet geahččat Norgga Álbmotdearvvašvuođainstituhtta neahttasiiddu dieđuid errema ja isolašuvnna birra.

Jus leat erremis danin go leat buohcci dahje illáveaje

Jus dus lea feber dahje eará korona buozanvuođamearkkat, de galggat isoleret iežat nu jođánit go vejolaš, ja váldit oktavuođa doaktáriin tlf 116 117.