skábmamánu 11. beaivi 2020

Sámi allaskuvla almmuha ođđa podcasta

Dál beasat oahpásmuvvat dutkamii ja dutkanfáttáide guoimmuheami bokte go Sámi allaskuvla almmuha ođđa podcasta “Sáhkavuorru”. Podcasta prográmmajođiheaddjit leaba girjjálašvuođa professor Harald Gaski ja filbmadahkki Per Josef Idivuoma. 

Podcastas leat vihtta episoda ja vuosttaš episoda almmuhuvvui skábmamánu 10. beaivvi. Juohke episodas beasat oahpásmuvvat Sámi allaskuvlla dutkiide ja dutkanfáttáide. Sii čilgejit álkkes vuogi mielde iežaset dutkanprošeavttaid birra, seammás go muitalit manin sii beroštišgohte juste daid áššiid guorahallat mii šattai sin karriearan.

Ulbmil podcasttain lea gaskkustit dutkama ja dutkiid fágalaš sisdoalu guoimmuheami bokte. Seammás garvit dutkiid árbevirolaš ovdanbuktinvuogi – logaldallama.

Prográmmaráiddus ilbmá ođđa Podcast juohke goalmmát vahku gitta ođđajagi rádjái. Fáttát maid birra ságastallet leat sámi báikenamat, juoigan, duodji ja álgoálbmotjournalistihkka. Ja dieđusge juovllaid áigge ságat sámi biepmuid birra, ja manin dat leat nu dearvvaslaččat.

Guldal vuosttáš episoda

Dán episodas oahpásmuvat Kaisa Rautio Helanderii ja sámi báikenammadutkamii. Kaisa lea professor Sámi allaskuvllas ja lea riikkaidgaskasaš báikenammadutkama áššedovdi. Podcastas gulat buriid ovdamearkkaid Kaisa dutkansuorggis, ja son maiddá muitala mii dat lei mii oaččui su čuovvulit dakkár bálgá iežas dutkamis.

Don sáhtát guldalit Sáhkavuorru čuovvovaš Podcasta kanálaid bokte:

Guldal Sáhkavuoru Spotify bokte

Guldal Sáhkavuorru Captivate bokte

Guldal Sáhkavuorru Apple bokte