MA - Program

Sámi vuođđoskuvlaoahpaheaddjeoahppu 1.-7. ceahki master

Dihtet go don ahte oahpaheaddjeoahppu lea máilmmi deháleamos ámmát?
Mánáidskuvlaoahpaheaddji lea dehálaš olmmoš ohppiid eallimis ja dat mielddisbuktá stuora ovddasvástádusa. Du bargu lea áŋgiruššat ja movttiidahttit ohppiid oahppat, ja beroštit sin oahppobirrasis.

  • Oahpahusgiella: Sámegiella. Logaldallamat ja seminárat sáhttet maiddái leat eará gielaide.
  • Oahpahusbáiki: Neahta bokte ja deaivvadeamit Sámi allaskuvllas, Guovdageainnus.
  • Ollesáiggi, 5 jagi.
  • 300 oahppočuoggá.
  • Hárjehallamat skuvllain sihke Norggas, Ruoŧas ja Suomas.
  • Prográmmaplána
  • Diibmoplána ja deaivvadanplána: TimeEdit
     

Oahpu birra
Sámi vuođđoskuvllaoahpaheaddjeoahpu 1.-7. ceahki master addá dutnje nanu fágalaš ja praktihkalaš mastergráda gos sámegiella, sámi kultuvra, servodat, sámi oahpahanoaidnu - ja málle, árbevirolaš máhttu ja eamiálbmotperspektiiva leat oahpu vuođđun. Dákkár dási oahppu ii fállojuvvo eará sajes. 

Sápmi dárbbaša čeahpes, áŋgiris ja áigeguovdilis oahpaheddjiid. Dán oahpus don oahpat mo heivehit oahpahusa juohke oahppi dárbbuide vai sii ohppet lohkat, čállit ja rehkenastit.


Dihtet go ahte sáhtát orrut iežat ruovttus ja goitge čađahit vihtta jagi masteroahpu?
Oahppu fállojuvvo neahttaoahpahussan ja deaivvademiiguin. Deaivvadeamit bistet vahku hávális ja leat sullii njealje-viđa geardde jahkebealis. Neahttaoahpahusa sáhtát maid čuovvut luohkkálanjas Diehtosiiddas.
 

Hárjehallan
Oahppu lea praktihkalaš, ja Sámi allaskuvllas čađahit hárjehallamiid sihke Norggas, Ruoŧas ja Suomas gos beasat vásihit oahpaheaddjevirggi buot oktavuođain. Sámi allaskuvlla studeanttain leat maiddái buorit vejolašvuođat mannat oanehisáiggi dahje guhkitáiggi lonohallamii olgoriikii.
 

Oahppomodealla
Oahpu geatnegahtton fágat leat álgooahpahus, pedagogihkka, sámegiella, matematihkka ja dárogiella/ ruoŧagiella/ suomagiella. Lassin studeanta lohká vel njealját oahpahusfága mii addá fágalaš deattu. Maŋemus oahppojagi studeanta vállje álgooahpahusa siskkobealde fáttá, ja čađaha masterdutkosa.
 

Bargovejolašvuođat
Sámegielat oahpaheaddjit leat earenoamáš bivnnuhat, ja sii geat dasa lassin leat sámi oahpu váldán leat earenoamáš gelbbolašvuođa háhkan maid skuvllat miehtá Sámi ja olggobeale Sámi guovlluid dárbbašit. Sámi oahpaheaddjeoahppu addá máŋggabealat gelbbolašvuođa sihke gielalaččat, fágalaččat ja olmmošlaččat bargat ohppiiguin, oahpahusain, fágaiguin ovdánahttimiin ja dutkamiin skuvllas. Oahppu maid addá vuođu bargat jođihemiin, oahppo- ja bajásšaddansuorggi áššiiguin, ja muđui sámi ja eamiálbmotáššiiguin.
 

Stipeandavejolašvuođat
Sámi oahpaheaddjeoahpuin leat earenoamáš buorit stipeandavejolašvuođat. Lea Norgga Sámediggi mii hálddaša stipeanddaid. Loga eambbo Sámedikki neahttasiiddus.
 

KOORDINATOR

Rauni Äärelä-Vihriälä
+358 45 2748726
rauniav@samas.no

Entrance requirements

  • Oppalaš lohkangelbbolašvuohta ja unnimusat 35 skuvlačuoggá.
  • Norgga bealde ohcciin gáibiduvvo unnimusat árvosátni 4 matematihkas (224 diimmu) dahje ceavzán juogo S1, S2, R1 dahje R2, ja unnimusat árvosátni 3 dárogielas ja sámegielas oktii.
  • Suoma-, Ruoŧa-, ja Ruošša bealde ohcciin galgá vástideaddji árvosátni matematihkas ja iežaset riikka majoritehtagielas ja sámegielas.
     

Suoma bealde ohcciin gáibiduvvo čuovvovaččat:

  • Dus fertejit leat unnimusat 35 skuvlačuoggá (loga eambbo dáppe (dárogillii))
  • Matematihkka árvosátni 4: gáibiduvvo árvosátni 4 dahje buoret matematihkkafágas (224 diimmu) Norgga joatkkaskuvllas. Don deavddát árvosátnegáibádusa jus dus lea:
  1. Árvosátni 8 dahje buoret oanehis (kort) dahje dábálaš (allmänn) matematihkas, 6 kurssa loahppaduođaštusas/ Lukion päästotodistus, dahje
  2. Árvosátni 5 dahje buoret oanehis (kort) dahje dábálaš (allmänn) matematihkas, 7 kurssa loahppaduođaštusas/ Lukion päästotodistus, dahje
  3. Árvosátni 5 dahje buoret guhkes (lång) dahje čiekŋudeaddji (fordjupad) matematihkas, 10 kurssa loahppaduođaštusas/ Lukion päästotodistus, dahje
  4. Cum laude approbatur (C) matematihkas studentereksamenis / Ylioppilastutkintotodistu

      Jus dus lea oanehis (kort) dahje dábálaš (allmänn) matematihkas árvosátni 6, de sáhtát ohcat matematihka ovdakursii.

      Jus it deavdde matematihkka árvosátnegáibádusa, de fertet čađahit matematihka Norgga joatkkaskuvllas ja olahit árvosáni 4 dahje buoret.

  • Dárogiela ja sámegiela árvosátnegáibádus: gáibiduvvo unnimusat gaskamearalaš árvosátni 3 dahje buoret dárogielafágas Vg3 (309 diimmu) dahje sámegielafágas (309 diimmu) oktii. Don deavddát dán gáibádusa jus dus lea:
  1. Árvosátni 6 dahje buoret ruoŧagielas ja sámegielas loahppaduođaštusas / Lukion päästotodistus dahje 
  2. Árvosátni Cum Laude Approbatur dahje buoret ruoŧagielas ja sámegielas oktii studenteksamenis / Ylioppilastutkintotodistus

 

Ruoŧa ohcciide gávdnojit dieđut dáppe (dušše dárogillii)

​​Jus deavddát sisabeassangáibádusaid Sámi vuođđoskuvlaoahpaheaddjeohppui boares ortnega mielde, muhtto it deavdde gáibádusa mas gáibiduvvo unnimusat árvosátni 4 matematihkas, de sáhtát ohcat beassat searvat ovdakursii. Ovdakursii ozat oktasaš sisaváldima bokte, www.samordnaopptak.no. Dát mearkkaša ahte jus dus lea gaskamearalaš árvosátni gaskkal 3,00 ja 3,99 matematihkas (224 diimmu), de don sáhtát ohcat beassat ovdakursii mainna sáhtát gokčat gáibádusat mas gáibiduvvo unnimusat árvosátni 4 matematihkas. Ovdakursa fállojuvvo suoidnemánus neahttaoahpahussan ja nášunála loahppaeksámen lea borgemánu álggus

Studenten

- Áigi lea buoremus oahpaheaddji. Sámi oahpaheaddjeoahppu lea erenoamáš buorre go sámi giella ja kultuvra lea nu nanus oassi juohke fágas.
Bilde av student Gisle Soleng
Gisle Soleng