BA - Single course

DUO-1005 Plánen, hutkáivuohta ja duddjon

  • Oahpahusgiella: Sámegiella ja sáhttá maid leat eaŋgalasgillii.
  • Oahpu lágideapmi: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Logaldallamiidda lea vejolaš oassálastit neahta bokte, muhto hárjehusat ja bargobájit gáibidit fysalaš searvama.
  • 15 oahppočuoggá
  • Oahppoplána
  • Liŋka: Diibmoplána
  • Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Oahppu lea duoji bachelorprográmma geatnegahttojuvvon duodjefágalaš vuođđooahppu. Earátge sáhttet ohcat ohppui, ja oahppu sáhttá leat doarjjafágan dahje válljenfágan eará bachelorprográmmain dahje eará oahpuin.

Sisdoallu

Oahpus vuojulduvvat dasa, mo plánet, duddjot ja gaskkustit duoji. Oahppu fállá praktihkalaš ja teorehtalaš dieđu, mainna studeanta ovddida iežas hutkáivuođa ja viiddida iežas duodječehppodaga ja áddejumi. Oahpus ávkkástallat čuolmmaidčoavdinmetodaiguin, mat fállet studentii reaidduid plánemii, hábmemii ja duddjomii. Oahpus suokkardallat hutkáivuođa duddjonproseassas. Studeanta sáhttá iežas beroštumi mielde válljet dipma- dahje garraduoji suorggi.

 

OAHPAHAN- JA OAHPPANVUOGIT


Bargobájit, logaldallamat, lohkanmeari lohkan, hárjehusat ja bagadallamat.


GÁIBÁDUSAT BEASSAT EKSÁMENII


Ovdal beassá eksámenii, galgá studeanta:
- Oassálastit unnimusat 75 % lágiduvvon oahpahusas
- Dahkat guokte geatnegahtton barggu ja portfolio mas leat čuovvovaš barggut:
1. Praktihkalaš joavkobargu
2. Oktagaslaš duodji


Fágaoahpaheaddji dohkkeha gáibádusaid beassat eksámenii.

Filesize: 188 KB

Entrance requirements

• Dábálaš sisabeassangáibádusat alitoahpahussii. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga/gymnása) dahje reálagelbbolašvuohta. Oppalaš lohkangelbbolašvuođa gáibádusat olgoriikkaohcciide bohtet ovdan NOKUTa GSU-listtus. Go oahppu lágiduvvo sámegillii, de olgoriikkaohcciide ii gusto dárogielagáibádus, vrd. Forskrift om opptak til høgare utdanning § 2-2 (6).
• Sámegielmáhttu.
• Duodje-, dáidda- dahje hábmengelbbolašvuohta
Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida.


Duodje-, dáidda- dahje hábmengelbbolašvuođa gáibádusa sáhttá duođaštit čuovvovaš vugiid mielde: Norgga joatkkaskuvllas čađahan duodje-, dáidda- dahje hábmenoahpu, Suomas duodje-, dáidda- dahje hábmensuorggi artesánaoahpu, Ruoŧa gymnásas čađahan estehtalaš- dahje sámeprográmma. Duodje-, dáidda- dahje hábmengelbbolašvuođa sáhttá maiddái deavdit jus lea maŋŋel joatkkaskuvlla čađahan unnimusat jagi duodje-, dáidda- dahje hábmensuorggi oahpu ámmátskuvllas dahje fágaskuvllas, dahje universitehta- ja allaskuvladásis čađahan unnimusat 15 oahppočuoggá duodje-, dáidda- dahje hábmensuorggi oahpu.

Jus ohccis ii leat formála gelbbolašvuohta fágasuorggis, de sáhttá ohcci maiddái duođaštit duodje-, dáidda- dahje hábmenfágalaš gelbbolašvuođa iežas bargguid bokte. Dasto galgá juogo sáddet sisa ja oažžut dohkkehuvvot:
− Govaid unnimusat viđa duojis, dahje
− 2-3 duodje-, hábmen dahje dáiddalaš prošeavttain, mat čujuhit kreatiivvalaš proseassaide, ovdamearkka dihtii portfolio


Dárbbu mielde ovddiduvvo gelbbolašvuođa meroštallan fágalaš árvvoštallamii ja meannuduvvo dán vuođul. Sáhttá nai čađahuvvot ságastallan duodjegelbbolašvuođa árvvoštallama doarjjan.