Buohccidivššároahppu: ovttasbargošiehtadus UiT:in sajis
Dál lea UiT Norgga arktalaš universitehta ja Sámi allaskuvla vuolláičállán šiehtadusa mii sihkkarasta ahte sámi buohccidivššároahppu álggahuvvo juohke nuppi jagi Sámi allaskuvllas.
Šiehtadusas boahtá ovdan ahte oahppu lea oassin UiT buohccidivššár bacheloroahpus, ja Sámi allaskuvllas lea ovddasvástádus sámi sisdoalus ja lohkanbáiki lea Sámi allaskuvllas Guovdageainnus. Stuoradiggi lea 2019:s juolludan ruđa ásahit sierra sámi buohccidivššároahpu. Vuosttaš studeantajoavku álggii 2021:s ja oahppu bistá njealjje jagi.
-Lea hui buorre go dál lea vuolláičállon Sámi buohccidivššároahpu ovttasbarggus gaskkal UIT ja Sámi allaskuvlla. Oahppu han lea juo jođus. Mihttun lea ahte mii duođaid vuoruhat ja ovdánahttit buohccidivššároahpu, ja ahte dát lea davviriikalaš dásis, miehtá Sápmái, dadjá rektor Liv Inger Somby.
