Bilde av kunstverk laget av Britta Marakatt-Labba
miessemánu 31. beaivi 2017

Máilmmi stuorimus dáiddačájáhusas

Sámi allaskuvlla lektor Britta Marakatt-Labba lea okta dan guđa Sámi dáiddáris geas dáidagat čájehuvvojit allaárvosaš čájáhusas, Documenta 14.

Sámi dáiddárat leat dál beassan oassálastit máilmmi stuorimus dáiddačájáhusii, Kassel gávpogis Duiskkas ja dat mearkkaša olu Britta Marakatt-Labbai.

— Munnje persovnnalaččat mearkkaša dat ahte eanet olbmot dovdet mu dáidagiid stuorit máilmmis. Go dal leat válljen čájehit eamiálbmot dáidaga, de maid geahččit besset dovddáskit sámi dáidagii, ja dat lokte min sámi dáidaga árvvu, dadjá Britta Marakatt.

Bilde av Britta Marakatt-Labba fra Wikipedia
— Mon gii barggan sákkaldagaiguin, munnje mearkkaša ahte dát dáiddavuohki lea ožžon áibbas eará ”stáhtusa” dáiddamáilmmis. Guhkes rahčama geažil lea loktanan árvu dan dáiddasuorgái. Galleriijat ja stuorit dáiddamuseat háliidit čájehit sámi dáidaga ja čalmmustahttit dan. Documenta 14 lea rahpan ođđa uvssaid minsiidda, loahpaha Marakatt-Labba.

Earágo Britta Marakatt-Labba de leat Documenta 14:is maiddái Synnøve Persen, Joar Nango, Máret Ánne Sara, Hans Ragnar Mathisen ja maiddái Iver Joks rohki dáidagat.