Sámi logut muitalit
Sámi statistihka fágalaš analysajoavku lea mannan vahku almmuhan raportta Sámi logut muitalit 13. Raporttas leat artihkkalat main ovdanbuktojuvvojit iešguđet fágasurggiid dilit ja maiddái rávvagat.
Analysajoavkku lahtut Snefrid Møllersen ja Iulie Aslaksen leaba čállán artihkkala sámi statistihka geavaheami birra bajit dási perspektiivvas. Lene Antonsen ja Trond Trosterud ges leaba čállán sámegiela digitála resurssaid geavaheami birra. Trosterud lea vel čállán Norggas almmuhuvvon sámegielat girjjálašvuođa birra. Kevin Johansen lea guorahallan sámegielaid dili mánáidgárddiin, ja Anders Sønstebø ovdanbuktá muhtin guovddáš tabeallaid mat addet gova movt iešguđet áššit rievddadit guhkes áiggi badjel.
Fágalaš analysajoavku galgá juohke jagi ovdal golggotmánu 1.b. buktit raportta Gielda- ja ođasmahttindepartementii ja Sámediggái. Raporta galgá, nu guhkás go vejolaš, addit gova ja árvvoštallama Norgga sámi servodaga diliin ja ovdáneamis. Raporta šaddá vuođđun jahkásaš bušeahttabargui ja konsultašuvnnaide gaskal stáhtalaš eiseválddiid ja Sámedikki.
Sámi allaskuvllas lea koordináhtorrolla dán barggus.
- Dás gávnnat visot Sámi logut muitalit-raporttaid mat leat almmuhuvvon 2008 rájes. Neahttasiiddus sáhttá válljet ee. giela, čálli ja fágakategoriijaid gaskkas.
