golggotmánu 23. beaivi 2017

Ođđa studeantalohkuolahus Sámi allaskuvllas

Sámi allaskuvla geasuha studeanttaid.

Eai goassege ovdal leat leamaš ná olu studeanttat Sámi allaskuvllas. Dan čájehit varas logut Norgga dutkandáhtaguovddážis, NSDas. Sámi allaskuvllas leat oktiibuot 270 studeantta 2017 čavčča.

- Dát leat erenomáš somás logut ja dat čájeha ahte mii leat riekta bargame, dadjá Sámi allaskuvlla rektor Gunvor Guttorm.

Sámi allaskuvllas lea mihttomearrin leat sámiid ja eamiálbmogiid oahppo- ja dutkanásahus mas lea nana fágalaš profiila ja leage oassin strategiijaplánas šaddat studeanttaid vuosttaš vuoruheapmin studeren- ja dutkanásahussan. 

Data fra NSD DATABASE FOR STATISTIKK OM HØGRE UTDANNING

Dát oahput geasuhit

Sámi allaskuvlla oahput leat juhkkojuvvon golmma goahtái: gielladieđagoahti, servvodatdieđagoahti ja duodje- ja oahpaheaddjeoahpuid dieđagoahti. Dáin NSD loguin leat 14 studeantta Sámi allaskuvlla fágabargit, geat leat gelbbolašvuođa loktemen NET 180 oahpuin.  

Gielladieđagoađis leat eanemus bivnnuhis oahput álgooahput sámegielas. 26 studeantta leat álgokurssain olggobealde allaskuvlla. Sámi allaskuvlla álgooahput sámegielas lágiduvvojit ee. Álttás, Kárášjogas, Johkamohkis, Plassjes ja Guovdageainnus. 

  • Davvisámegiella praktihkalaš dilis - álgooahppu 1. oassi (Kárášjogas) - 14 studeantta
  • Davvisámegiella praktihkalaš dilis - álgooahppu 2.oassi (Guovdageainnus) - 14 studeantta
  • Sámegiela ja sámi girjjálašvuođa mastergrádaoahppu - 12 studeantta
  • Sámegiela ja sámi girjjálašvuođa bachelorgrádaoahppu - 11 studeantta
     

Duodje- ja oahpaheaddjeoahpuid dieđagoahtái gártet eanemus studeanttat praktihkalaš pedagogalaš ohppui.

  • Praktihkalaš pedagogalaš oahppu - 21 studeantta
  • Sámi vuođđoskuvlaoahpaheaddjeoahpu 5.-10. ceahki mastergráda - 19 studeantta
  • Sámi mánáidgárdeoahpaheaddjeoahppu - 18 studeantta
  • Sámi vuođđoskuvlaoahpaheaddjeoahpu 1.-7. ceahki mastergráda - 17 studeantta


Servvodatdieđagoađis leat eanemus studeantat árbediehtu oahpus.

  • Sámi árbediehtu - 9 studeantta
  • Sámi journalistihka álgoálbmot perspektiivvas masterprográmma - 8 studeantta 
  • Boazodoallooahpuid bachelorprográmma - 6 studeantta
  • Sámi praksisat I - 6 studeantta

 

Dus lea maid vejolašvuohta Sámi allaskuvlii álgit studeantan.
Hás don ozat?

 

Jagi 2002is Sámi allaskuvllas ledje 269 studeantta.