Joatkkaoahput oahpaheddjiide

VDUO-6001 Duodji 1 joatkkaoahppun vuođđoskuvlaoahpaheddjiide

  • Oahppu lágiduvvo neahttadoarjjaoahpahussan: Oassi oahpus lágiduvvo fysalaš deaivvadeapmin Sámi allaskuvllas, ja oassi neahttadeaivvadeapmin ja neahttaoahpahussán.
  • Oahpahusgiella: Davvisámegiella
  • 30 oahppočuoggá
  • Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Duodji 1 -oahppu fállá duddjomis praktihkalaš ja teorehtalaš vuođđodieđu, maiguin viiddidit studeantta čehppodaga oahpahit duodjefága vuođđoskuvllas. Oahpahusas vuodjut sierralágan duddjoma vugiide, teknihkaid, reaidduid ja ávdnasiid geahččaleapmái. Lagaš luonddu- ja kultuvrralaš biras leat vuolggasadjin duddjoma lahkoneamis. Sámi duoji vuolggasadjin lea árbevirolaš diehtu ja máhttu. Oahpaha maiddái ipmirdit mot oahpaheaddji sáhttá iešguđetge cehkiin gaskkustit kultuvrralaš árbevieruid ja estehtalaš vásáhusaid, addit saji ođđa fuomášumiide, doarjut oahppama ja hutkás doaimmaid. Dásseárvvu, ohppiid eallindili ja iešguđet gillámušaid vuhtiiváldin lea dehálaš iežas guorahallannávccaid ovddideamis fágaplána sisdoalu ektui. Oahpahus galgá čielggasmahttit pedagogalaš fágageahčastaga ja fágii gullevaš dutkama, sámi ja álgoálbmot geahččanguovllus. Studeanta galgá čađahit suodjaluskurssa, ovdalgo beassá oassálastit oahpahussii.

Duodji 1 juohkása guovtti oassái:

1. Duodjediehtu ja duodjeteknihkkat

Oasi sisdoallun leat vuođđodieđut duojis ja duddjomis, sihkarvuohta ávnnasteami ja duddjoma oktavuođas, duodjediehtu ja –teknihkkat, duddjon. Duddjon lea stuorra oassi oahppofálaldagas. Čuovvovaš fáttát leat guovddážis:

  • Suodjaluskursa
  • Reaiddut ja reaidogeavaheapmi
  • Ávnnasoahppa, ávnnasteapmi ja ávnnasdikšun
  • Iešguđet lágan duodjeteknihkkat
  • Sárgun ja hábmen
  • Duddjon

2. Duodji árbedieđu ja kultuvrra guoddin, duoji skuvllas oasis vuoddjut čuovvovaš fáttáide:

  • Duodji iešguđet guovlluin
  • Árbediehtu ja árbevierru
  • Estetihkka
  • Duodjedidaktihkka
  • Duoji našuvnnalaš oahppoplánat
  • Duddjon

Bargogáibádusat: 

Studeanta galgá:

  • aktiivvalaččat oassálastit unnimusat 80% deaivvademiin, bagadallamiin ja praktihkalaš doaimmain
  • čađahit didákttalaš- ja oahpahusbarggu skuvllas
  • bargat praktihkalaš bargguid ja dokumenteret daid iešguđet vugiin

Eksámen:

Eksámenis leat guokte oasi:
1. Portfolio bargogáibádusaid vuođul. (70 % deaddu)
2. Ovdanbuktin čájáhusa oktavuođas (30 % deaddu)

Sisabeassangáibádusat

Čađahuvvon oahpaheaddjeoahppu mii addá gelbbolašvuođa oahpahit vuođđoskuvllas, ja sámegielmáhttu.

Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.

Koordinator

raunat's picture
Triumf, Kristin Ravna A
Phone: 
E-mail: 
Kristin-Ravna-A.Triumf@samiskhs.no