VALG-6100 Álgooahpahusa čiekŋudeapmi – joatkkaoahppun vuođđoskuvlaoahpaheddjiide

• Oahpu lágideapmi: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Fysalaš deaivvademiid ii leat vejolaš čuovvut neahta bokte.
• Oahpahusgiella: Davvisámegiella
• 25 oahppočuoggá
• Liŋka:  Oahppoplána
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Fága čiekŋuda álgooahpahusa ceahki ohppiid oahppamii ja skuvlaovdáneapmái. Čiekŋudeami mihttun lea addit studeanttaide reaidduid, maiguin sihkkarastit 1.- 4. ceahki ohppiide vejolašvuođa háhkat vuođđomáhtu lohkamis, čállimis ja matematihkas ja vuhtii váldit maiddai estehtalaš ja praktihkalaš beliid álgooahpahusas. Čiekŋudeami ulbmilin lea nannet oahpaheaddji návccaid oaidnit oahppi ollislaččat, vai son nagoda sihkkarastit ahte buot oahppit besset háhkat alcceseaset fágalaš ja sosiálalaš gelbbolašvuođa skuvllas. Dása dárbbaša oahpaheaddji máhtu das, mo oahppit álgooahpahusas háhket gelbbolašvuođa lohkamis, čállimis, matematihkas ja estehtalaš ja praktihkalaš beliin.

Gáibádusat beassat eksámenii: 

Čuovvovaš gáibádusat ovdal studeanta beassá eksámenii:

• Gáibiduvvo ahte studeanttat oassálastet aktiivvalaččat lágiduvvon oahpahussii (unnimustá 80 %).
• Studeanta galgá čállit 10 oanehis reflekterejeaddji čállosa mat čatnasit álgooahpahusa váldofáttáide.
• Čađahit didákttalaš- ja oahpahusbarggu skuvllas álgooahpahusdásis.

Eksámen:

Eksámen lea čálalaš ruovttueksámen mas studeanta čállá 15-20 siidosaš esseija álgooahpahusa iešvuođain iežas válljejuvvon fáttás.