PED 620 Jođiheapmi, ovttasbargu ja ovddidanbargu joatkkaoahppun mánáidgárdeoahpaheddjiide
- Oahpu lágideapmi: Oahppu lágiduvvo geabbilis neahttavuđot oahppun deaivvademiiguin.
- Oahpahusgiella: Oahpahusgiella lea davvisámegiella. Soames logaldallamat sáhttet leat eará sámegielaide, dahje skandinávagillii. Lohkanmearri lea sáme-, dáro-, ruoŧa- ja/dahje eŋgelasgillii. Čálalaš barggut/eksámenbarggut čállojuvvojit sámegillii.
- 15 oahppočuoggá
Oahppoplána- Deaivvadanplána
- Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no
Oahpu fáttát leat pedagogalaš jođiheapmi mánáidgárddis, bargiidjođiheapmi ja ovdánahttinproseassaid jođiheapmi máŋggabealat mánáidgárdebirrasis, ja maid ovttasbargan váhnenovddasteddjiiguin ja olggobeale ásahusaiguin. Oahppu deattuha áddejumi das mo jođihandaguin sáhttá váikkuhit nu, ahte mánáidgárdi nannejuvvo oahppan- ja ovdánahttinarenan ja ahte dat lea fátmmasteaddji mánáide, váhnenovddasteddjiide ja bargiide ja ahte doppe sihkkarastojuvvo ovttaárvosašvuohta.
Guovddáš áššit leat árbevirolaš jođihan- ja ovttastallanvuogit, mánáid ja mielbargiid oahppanproseassaid bagadallan ja jođiheapmi ja strategiijaid geavaheapmi iešguđetlágan metodaid ja reaidduid hábmema várás. Oahpu vuolggasadji lea sámi árbevirolaš máhttu ja deattuhuvvo reflekšuvdna earret eará dain áššiin: kultuvra, fápmu, jođiheapmi, mielváikkuheapmi ja demokratiija. Maiddái galgá oahppu addit áddejumi ahte mánáidgárdefálaldat lea integrerejuvvon oassi sámi servodagas. Studeanta galgá beassat hárjánit oaidnit pedagogalaš práksisiid (geavadiid) ođđa vugiiguin ja vuođuštit ja gaskkustit daid.
Deaivvademiid gaskkas studeanta galgá beassat jođihit ovdánahttinproseassa organisašuvnnas ja ovttaskas olbmuid dásis. Daid vásáhusaid vuođul galgá reflekteret jođiheami, rievdadeami, ovdánahttima ja iežas jođihangelbbolašvuođa ámmátrollas. Oahpu vuođđun leat pedagogihkka, sámegiella ja servodatfága. Oassin oahpus lea mánáidgárdepedagogalaš geahčastat ja fágadidákttalaš dutkan.
