juovlamánu 19. beaivi 2014

13,5 miljovnna ruvnnu sámi mánáidgárdeoahpaheaddjeohppui

”Bargosajis sámi mánáidgárdeoahpaheaddjeoahppu”

Oahpahusdirektoráhtta lea 17.12.2014 juolludan Sámi allaskuvlii kr 13 500 000 prošektii “Bargosajis sámi mánáidgárdeoahpaheaddjeoahppu – Arbeidsplassbasert samisk barnehagelærerutdanning”, mannjel go Sámi allaskuvla bijai fálaldaga Oahpahusdirektoráhta fálaldatgilvui.
Juolludeapmi lea 20 studeantta ovddas.
 
Gazzat oahpu seammás go bargá mánáidgárddis.  
Oahppu lea fálaldat sidjiide geat barget mánáidgárddiin veahkkebargin dahje fágabargin, ja háliidit loktet iežaset gelbbolašvuođa mánáidgárdeoahpaheaddjin. Oahppu lea heivehuvvon nu ahte sáhttá gazzat oahpu seammás go bargá mánáidgárddis.
 
Davvi-Norggas ja Oslos
Oahppu lágiduvvo ovttasbarggus Finnmárkku, Tromssa ja Norlándda fylkkaiguin ja Oslo suohkaniin. Dat lea allaskuvlla vuosttaš oahppoprográmma man mii fállat Osloi, dadjá allaskuvlarektor.
 
Vuoitu Sápmái
- Das lea stuorra ávki ja vuoitu olles sámi servodahkii. Sámi allaskuvla illuda ahte sáhttá láhčit mánáidgárdebargiide dili sámi alitoahpu váldit barggu olis, dadjá Sámi allaskuvlla rektor Jelena Porsanger. 
Doaivut ahte mánáidgárdebargiin lea dása beroštupmi ja ahte oallugat ohcet studeantan dán earenoamáš fálaldahkii.  Dát lea buorre juovlaskeaŋka mánáidgárddiide, loahpaha Porsanger.
 
Sámegillii
Oahpahus čađahuvvo sámegillii. Oahppoarenat leat mánáidgárddit gos studeanttat barget, bargohárjehallamat, neahttaoahpahus ja muhtomin leat deaivvadeamit Sámi allaskuvllas. 
Oahppu álggahuvvo 2015 čavčča, ja čađahuvvo oasseáiggis njealji jagis. 
Rekrutteren, ohcanáigi  ja sisaváldin dáhpáhuvvá 2015 giđa mielde.
 

Čuovu áigemeriid dás: samas.no