Suoidnemánu 01. beaivi 2022

6 buori ákka studeret Sámi allaskuvllas

Áiggut go álgit studeret dán čavčča? Dá leat 6 buori ákka manne juste don galggat válljet oahpu Sámi allaskuvllas.
 

  1. Sámi allaskuvllas lea nanu sámi oahppobiras
    Sámi allaskuvllas lea nanu sámi oahppobiras. Jus fárret Guovdageidnui, de fuobmát jođánit ahte Guovdageainnus lea ealli sámi biras. Sámegiella gullo beaivválaččat, sihke allaskuvllas ja márkanis.
     
  2. Sámi biras gos sámegiella ja sámi árbevierut leat guovddážis
    Sámi allaskuvlla vuolggasadji lea Sápmi - kultuvra, servodateallin, máŋggabealálašvuohta, árbevierut ja giella. Sámi allaskuvllas leat oahpaheaddjit geat máhttet giela, ipmirdit sámi servvodagaid dárbbuid ja kultuvrraid. 
     
  3. Lagas oahppobiras ja oktavuohta oahpaheddjiiguin ja mielstudeanttaiguin
    Sámi allaskuvllas lea ealli sámi biras gos beasat oahpásmuvvat eará sámi ja maiddái eará máilmmi guovllu olbmuiguin. Allaskuvllas lea unnit studeantavuođđu go stuorát universitehtain ja allaskuvllain. Dáppe mis lea buorre ja fátmmasteaddji oahppibiras, gos leat buorit vejolašvuođat oahpásnuvvat eará studeanttaiguin.
     
  4. Neahttaoahpahus ja deaivvadeamit
    Dihtet go ahte eanas oahput Sámi allaskuvllas lágiduvvojit neahttaoahpahussan ja deaivvademiid bokte Diehtosiiddas Guovdageainnus? Neahttaoahpahus ja deaivvadeamit addet studentii vejolašvuođa čađahit oahpu ja maiddái orrut vaikko. Studeanta dattege ferte searvat fysalaččat go deaivvadeamit leat geatnegahtton.
     
  5. Buorit lonohallanvejolašvuođat
    Háliidivččet go váldit oahpu Sámis, muhto niegat maiddái studeret olgoriikkas? Dus lea vejolašvuohta ollašuhttit goappaš sávaldagaid. Sámi allaskuvlla studeanttain leat buorit vejolašvuođat váldit oanehisáiggi dahje guhkitáigge lonohallama olgoriikkas. Lonohallamis sáhtát viiddidit iežat fierpmádaga, oahpásmuvvat ođđa riikkaide, kultuvrraide ja gielaide. 
     
  6. Buorit bargovejolašvuođat
    Studeanttat geat čađahit oahpuid Sámi allaskuvllas leat bivnnuhis bargoohccit. Jus ovdamearkka dihte čađahat sámi vuođđoskuvlaoahpaheaddjeoahpu dahje sámi mánáidgárdeoahpaheaddjeoahpu de leat dus sihkkaris bargovejolašvuođat. Olles sámis lea stuora dárbu sámi oahpaheddjiide geat máhttet giela, dovdet sámi kultuvrra, árvvuid ja servodateallima.

    Sápmi dárbbaša maiddái fágačehpiid fágasurggiin nugo boazoealáhusas, duojis, sámegielas ja sámi girjjálašvuođas, servodatfágas ja journalistihkas. Jus válljet oahpu Sámi allaskuvllas, de leat don mielde gokčame sámi servvodaga dárbbuid ja seammás hukseme sámi servvodaga iežat gelbbolašvuođai. 


    Jus it leat vel ohcan oahpposaji čakčii, de sáhtát ain ohcat rabas oahpposajiide báikkálaš sisaváldimis. Geahča makkár oahpuide sáhtát ohcat. 

    Suoidnemánu 20. beaivvi dii. 09:00 rájes sáhtát ohcat min prográmmaoahpuide main leat rabas oahpposajit oktasaš sisaváldima bokte (Samordna Opptak). 

     

    Vállje Sámi allaskuvlla!