Norgga ambassáda Argentinas ávvudii davviriikkalaš dutkanovttasbarggu
Davviriikkalaš dutkanovttasbargu olmmošvuoigatvuođaidoahpahusas ávvudedje erenoamáš doaluiguin Buenos Aires Universitehtas skábmamánu 26. beaivvi. Norgga gonagaslaš ambassáda Argentinas lei dorjon girjealmmuhandoaluid. Allaskuvllalektor Inger Elisabeth Utsi Gaup lea ovttas kollegaiguin Pigga Keskitaloin, Satu-Marit Kortein ja Sylvia Moorein čállán oasi antologiijas Nordic Perspectives on Human Rights Education: Research and Practice for Social Justice. Sin kapihttalis deattuhuvvo man deaŧalaš nannánvuođut oahpahus lea álgoálbmogiid vuoigatvuođaid sihkkarastimis oahpaheaddjeoahpu bokte.
Norgga ambassadevra, Halvor Sætre, galgá ovttas doaimmaheddjiiguin Beate Goldschmidt-Gjerløw (UiA) ja professor Audrey Osler (USN), Suoma ja Ruoŧa ambassadevrraid ovddasteddjiiguin, ja njunuš argentinalaš dutkiiguin digaštallat girjji riikkaidgaskasaš mearkkašumi.
- Min vuolggasadji sámi oahpaheaddjeoahpus lea jurddašit ođđa láhkai oahpahusa ja oahppama birra, nu ahte min studeanttat ožžot kultuvrralaččat heivvolaš oahpaheaddjeoahppoprográmma. Dat lea dárbbašlaš vai álgoálbmotvuoigatvuođat sihkkarastojuvvojit boahttevaš oahpaheddjiid árgabeaivvis, dadjá Elisabeth Utsi Gaup.
Nordic Perspectives on Human Rights Education lea vuosttaš girji mas lea sáhka olmmošvuoigatvuođaoahpahusa buot viđa Davviriikkain. Girjjis lea viiddis áŋgiruššan ja áigu institušuvnnalaččat doarjut guovllu olmmošvuoigatvuođaoahpahusa.
- Oanehis álggahanvideo girjji birra: Nordic Perspectives on Human Rights Education Video
