Sámi allaskuvla lágida Dutkanbeivviid iešguđet sámi guovlluin
Dutkanbeaivvit álget čakčamánu 18. b. ja bistet gitta 29. beaivái. Dán áigodagas lágiduvvojit iešguđetlágan dáhpáhusat miehtá Norgga, ja fáddá dán jagi lea biras gáržžádallan. Mainna lágiin lea biras rievdan daid maŋemus jagiid? Máid dahket dutkit ja máid sáhttit mii dahkat? Dutkanbeivviid oktavuođas leat Sámi allaskuvllas maiddái lágideamit earret eará Billávuonas, Deartnás ja Guovdageainnus.
Biras guoská dálkkádahkii ja birgejupmái. Muhto biras lea maiddái doppe gos mii vánddardit beaivválaččat – ruovttus, barggus ja sosiálalaččat. Visot dáhpáhuvvá birrasis. Danne leat maiddái olu gáržžádallamat ja bahkadasat maid mii fertet gieđahallat biras gažaldaga ektui. Sámi allaskuvllas leat njeallje iešguđetlágan lágideami mat guoskkahallet birasfáttá iešguđet ládje.
Mánnodaga 16. b. čakčamánus – Logaldallan Diehtosiiddas – Dii. 18:00-20:00 - Sáhkaskáiddis
Dr. Torsten Schäfer lea Darmstadt Universitehta journalistihka professor, ja bargá maiddái luonddu- ja dálkkádatjournalistan duiskka stuorámus áviissaid ovddas. Schäfer doallá rabas logaldallama Sámi allaskuvllas fáttáin “Indigenous communities and climate change. Experiences from a journalistic perspective - Álgoálbmot servodagat ja dálkkádatnuppástusat. Vásáhusat journalisttalaš vuolggasajis”.
Lávvordaga 28. b. čakčamánus – Logaldallan Deartnás (Tärnaby) – Dii. 18:00
Harald Gaski logaldallá dárogillii ja fáddá lea: Et helt folks livshistorie i en joik: Om Nils Mattias Anderssons vuelie “Mannen på Åvlavuelie”.
Lávvordaga 28. b. čakčamánus – Seminára Billávuonas – Dii. 12:00 – 15:00
Fáddá semináras: Mo máhtut ja árvvut bohtet ovdan mearrasámi lubmen ja monnečoagginvieruid bokte?
Vuođđun fáddái lea Sámi allaskuvla dutkanprošeakta Mo mearrasámi monnečoaggin- ja luomečoaggindoaibma boahtá oidnosii giela ja muitalusaid bokte? Mearrasiida lea okta ovttasbargoguimmiin. Earát leat: Árran Julevsáme Guovdásj mas luomečoaggin julevsámiguovllus lea dutkanfáddán ja NINA Naturbuk Lillehammer gii dutká fas luomečoaggima Várjjagis.
Prográmma semináras:
12.00 Mii lea dutkanprošeavtta ulbmil? – Solveig Joks ja Svanhild Andersen
12:30 Mo sáhttet dieđut boahtit ovdan báikenamain ja sámi doahpagiin? – Steinar Nilsen
13:00 Káfestallan
13:30 Mo monnečoaggin ja luomečoaggin váikkuha eallinkvalitehttii – Svanhild Andersen
14:30 Mo monne- ja luomečoaggin čatná olbmuid guovlluide? – Solveig Joks
14:30 Ságastallan
15:00 Mállásat
Panelaságastallan Diehtosiiddas
Panelságastallan maŋiduvvo ja lágiduvvo eará dáhtonis. Eambbo dieđut bohtet dađistaga.
