Sámi allaskuvlla almmolaš rahpandoalut

Odne lei Sámi allaskuvlla oahppojagi almmolaš rahpandoalut maid ođđa rektor Liv Inger Somby ja prorektor Samuel Valkeapää rabaiga. Soai sávaiga bures boahtima badjel 240 studeanttaide geat dál álget ođđa oahppojahkái.

Rektor ja prorektor deattuheigga sudno rahpansártnis dán positiivvalaš treandda maid Sámi allaskuvlla studeanttat vásihit ja man bivnnuhat leat bargomárkanis. Eanas studeanttat ožžot bargovejolašvuođaid ovdal go gerget oahpuin ja sávaiga ahte studeanttat čađahit oahpu – go de bohtet vel eanet vejolašvuođat ja eanet uvssat rahpasit. Soai deattuheigga maid makkár mearkkašupmi sámegiela giellaoahpus lea ja man dehálaš rolla dás lea servvodagas. Sápmi dárbbaša buot dási sámegielagiid, sihke davvi-, julevu- ja åarjelsámegielagiid- ja nuortalaš-, bihttám- ja upmi sámegielagiid. Sámi allaskuvllas lea guovddáš rolla bargat ja láhčit dili sámegielagiidda.

Sámediggeráđis Mikkel Eskil Mikkelsen lei maid mielde oahppojagi rahpamis, ja su sáhkavuorus ledje buori rávvagat studeanttaide, earenoamážit movt galgá eallit dál ja dás ja váldit vuostá vejolašvuođaid mat bohtet. Ledje maid dearvuođat Guovdageainnu sátnejođiheaddjis Hans Isak Olsen, Sámi ráđi presideanttas Áslat Holmberg ja várre rektoris UiT Norgga árktalaš universitehta Bente Haug ja studeantastivrra jođiheaddjis Martin Velky. Loahpas čađahuvvui Ofelaččaid soabbegeigenseremoniija, mas čalmmustahttá ahte dál leat ođđa Ofelaččat álgá sin barggu ja doaimma.

Sámi allaskuvllas leat dán vahkku olu lágideamit studeanttaide mas besset oahpásmuvvat sihke mielstudeanttaide ja camppusii. Sámi allaskuvllas sávvat studeanttaide bures boahtima ja lihkku skuvlavázzimin.

Prográmma lea dás vuollelis.