Sámi buohccidivššároahppu – don sáhtát váikkuhit makkár sisdoallu galggašii

Sámi buohccidivššárohppui lea evttohuvvon sierra láhkaásahus masa lea vejolaš ovddidit mearkkašumiid ja evttohusaid. Prográmmajoavku man Máhttodepartemeantta lea nammadan, lea ráhkadan sierra láhkaásahusa mas boahtá ovdan makkár máhttu, gálggat ja gelbbolašvuohta studeanttain galgá leat go gerget 3-jagi bacheloroahpuin ja autoriserejuvvojit sámi buohccidivššárin.

Láhkaásahus lea dál gulaskuddamis, ja prográmmajoavku mii lea hábmen njuolggadusaid sávvá ahte ollugat buktet iežaset cealkámušaid láhkaásahussii. Orru go láhkaásahus gokčame daid beliid maid sámi buohccidivššár galggašii máhttit go galgá bargat sámi pasieanttaiguin buohcciviesus, dearvvašvuođaguovddážis dahje vuorrasiidruovttus?

Dus lea vejolašvuohta váikkuhit makkár sisdoallu sámi buohccidivššároahpus galgá. Dás gávnnat liŋkka evttohuvvon láhkaásahussii ja diehtu mot sáddet sisa iežat cealkámuša. Áigemearri sáddet cealkámuša lea 06.06.2021:

• Høring Forslag til forskrift om nasjonal retningslinje for samisk sykepleierutdanning - regjeringen.no

Dás gávnnat dieđuid prográmmajoavkku birra:

• RETHOS: Samisk sykepleierutdanning - regjeringen.no

Sámi allaskuvlla gulahallanolmmoš áššis lea goahtejođiheaddji Anne Britt Klemetsen Hætta, tlf 78448499.