Sámi ealáhusaide heivehuvvon oahppu
Sámi allaskuvla fállá boahtte lohkanbajis oahpuid mat leat sámi ealáhusaide maid áigeguovdilat. Oahppu mii giđđat 2025:s vuosttaš gearddi lea fállun lea Strategalaš gulahallama vuogit sámi ealáhusaid dáfus.
Oahppu addá álgomáhtu strategalaš gulahallamis ja galgá ovdánahttit studeantta ipmárdusa ja máhtuid gulahallanproseassain.
- Dákkár máhttu lea dehálaš sámi ealáhusaide earenoamážit go ealáhusaid ovddasteaddjit oassálastet konsultašuvnnaide dahje industriála ovdánahttinprošeavttaid plánemii, omd. bieggafámu ja ruvkedoaimmaid plánemis, muitala oahppokoordináhtor Inker-Anni Sara.
Studeanta oahpásnuvvá strategalaš gulahallama guovddáš sáhkafáttáide ja reaidduide, ja besset guorahallet strategalaš gulahallama guovddáš beliid. Dasa gullá earret eará mot strategalaš gulahallamiin lea vejolaš váikkuhit almmolaš ságastallama ja buktit sámi ealáhusaid beliid oidnosii mearridanproseassain.
- Mun oainnán ahte mearridanproseassain dávjá báhcá sámi ealáhusaid oaidnu áššis, ja dákkár oahppu galggašii studeanttaid ráhkkanahttit strategalaččat gulahallat sihke almmolaš ságastallamis ja mearridanproseassain mas sámi geahčastat lea vuolggasadji, dadjá Inker-Anni Sara.
Inker-Anni Saras lea vuosttašamanueansa Sámi allaskuvllas ja su fága lea OCPR Organizational Communication and Public Relations, ja erenoamážit strategalaš gulahallan dan fága siskkobealde. Sara lea nákkáhallan OCPR:s 2019:s ja son dutkkai manin Suopma ii leat ratifiseren ILO 169 soahpamuša. Sara lea maid dutkan stuorra infrastruktuvrra prošeavttaid dego Fovsen ášši, Davvi vindpark ja Jiekŋameara ruovdegeainnu áššiid.
Allaskuvlla oahppu Strategalaš gulahallama vuogit sámi ealáhusaid dáfus čađahuvvo 2025 giđđalohkanbajis ja addá 30 oahppočuoggá (jahkebealovttadat). Ohcanáigemearri lea juovlamánu 1. beaivvi 2025.
