Bilde av Diehtosiida, vitenskapsbygg
golggotmánu 08. beaivi 2018

Stádabušeahtta 2019

Sámi allaskuvlla rámmaruhtadeapmi bissu seammá dásis. Ruhtadeapmi lassána 2,6 miljovnnain, mii oalle justte gokčá hadde- ja bálkálassáneami. Oktiibuot oažžut 93,3 miljon ruvnno stádabušeahta bokte.

Lassáneapmi lea čadnon guovtti váldooassái: vuođđorámmii ja boađusjuolludeapmái.

Sámi allaskuvlla vuođđorámmii addo lassáneapmi mii galgá gokčat hadde- ja bálkálassáneami. Das aŋkke gesso 455 000 ruvnno nu gohčoduvvon “avbyråkratiseringsreformen” geažil. Dat lea ráđđehusa politihkkalaš váikkuhus man ulbmil lea stádalaš ásahusaid movttidahttit beaktileabbon bargat.

Boađusjuolludeami lassáneapmi lea čadnon studeantalohkui ja dutkamii 2017s. Dutkanoassi stuorru 888 000 ruvnnuin, earenoamážit dan geažil go 2017s lihkostuvaimet EO-ruhtadeami ja BOA-sisaboađuid háhkat.

Vaikko ledje earenoamáš buorit studeantalogut 2017s, de aŋkke unnu ruhtadeapmi 227 000 ruvnnuin dan geažil go kandidáhttabuvttadeapmi unnui. Buvttadeapmi lea unni earret eará dan geažil go oahpaheaddjeoahppu ii oba álggahuvvonge 2013s, ja nu eai geargan kandidáhtat 2017s.

Go visot dáid bidjá oktii, de bušeahttalassáneapmi justte gokčá hadde- ja bálkálassáneami. Dat ges mearkkaša ahte Sámi allaskuvlla ruhtadeapmi bissu seammá dásis.

Bušeahttadetáljaid birra sáhtát eambbo dás lohkat.