njukčamánu 24. beaivi 2021

Studeantamentor virgealmmuheapmi

Sámi allaskuvllas leat guokte gaskaboddosaš 30%-virggi studeantamentoriin mas álgin lea farggamusat. Vuosttažettiin lea bargu olggos giđđalohkanbaji 2021, muhto doaibma sáhttá guhkiduvvot 2021-2022 oahppojahkái.

Studeantamentor galgá bargat dan ovdii ahte Sámi allaskuvlla studeanttain lea buorre ja fátmmasteaddji oahppobiras. Son galgá earret eará láhčit dili studeanttaide deaivvadit ságastallat fágalaš áššiid birra, leat olámuttos eará studeanttaide fágalaš áššiid oktavuođas, leat mielde pláneme studeanttaid vuostáiváldima 2021 čavčča. Studeantamentor galgá maid leat veahkkin ásahit fásta mentor-ortnega Sámi allaskuvlii. Don boađát ovttasbargat nuppi mentoriin, ja galgá leat lagas gulahallan oahppohálddahusain ja prográmmakoordináhtoriiguin.

 

Ohcan

Sádde ohcamuša masa čálát iežat birra, makkár oahpus leat, guđe jagi studeantta leat ja manne don sávašit virgáiduvvot studeantamentoriin. Bija CV mielddusin.

Ohcamuša oktan CV:in sáddet Canvasa bokte. Njuolggoliŋkka: Studeantamentor virgalmmuheapmi (instructure.com)

Ohcanáigemearri: 15.04.2021.

Eanet dieđuid virggi birra oažžu oahppohoavddas Áila Márge Varsi Balto, tlf + +4778448503, e-boasta: ailamvb@samas.no