Sámi musihkkaakademiija
Geassemánnu 15. beaivi 2018

Sámi musihkkaakademiija prošeakta

Sámi musihkkaakademiijas álgá ovtta jagi skuvlenprográmma joatkaskuvladásis mii fállá oahpahusa dain dieđuin ja dáidduin maid sámemusihka suorgi gáibida. Prográmma addá buori vuođu ohcat musihkkasuorggi joatkkaoahpuide. Oahpahusas deattuhuvvo sámemusihkka ja dan dehálaš doarjjan leat ee. musihkkateknologiija, máilmmi musihkkakultuvrraide oahpásmuvvan, musihkkateoriija, instrumeantaoahput ja ovttasčuojaheapmi sihke musihkkapedagogihka ja kulturfitnodoaibma. 

 

Oahput sisttisdollet ee. musihkkavideo ráhkadeami, iežas musihka komponerema ja heiveheami ja ovttasčuojaheami. Skuvla johtá Sámis ja mii fitnat ee. oahpásmuvvamin Guovdageainnu beassášfestiválii ja doallat konsearttaid máŋggain báikkiin. Bargat sihke joavkkus ja iehčanasat. Min oahpaheaddjit leat musihka sierra surggiid ámmátolbmot.

 

Sii geat čađahit vuosttas jagi oahpuid, sáhttet ohcat nuppi jagi prográmmii, mii álgá borgemánus 2019. Sámi musihkkaakademiija nuppi jagi oahput čiekŋudit vuosttas jagi oahpuid ja addet válmmašvuođa searvat musihkkasuorggi vuođđodutkosa čájáhusdutkosii/eksámenii dahje dan osiide. Čájáhusdutkkus/eksámen lágiduvvo geassit 2020.

 

Gáibádusat ohccis

-sámekultuvra dovdamuš

-beroštupmi musihkas (FUOM! Ovddeš musihkaoahput eai dárbbašuvvo)

 

Bistá: 13.8.2018-31.5.2019

Oahppočuoggát: 60

Ohcanáigi: 10.4.-20.6.2018

Oahpahusbáiki: Ohcejohka

Oahpahusgiella: Sámegiella, veahkkegiellan suomagiella ja eaŋgasgiella

 

Sámi musihkkaakademiija prošeavttas ovddiduvvo ja vuođđuduvvo oahpahusfierpmádat, ulbmil lea ovddidit ja nannet sámemusihka boahtteáiggis. Oahppu lea guovtti jagi badjel, nuppi dásis musihkaoahpaheamis. Oahpahusat ja deaivvadeamit lágiduvvot Ohcejogas, ja dat lea maiddai musihkkaoahpahus Sámi allaskuvlla oahpaheaddji ja mánáidgárdeoahpaheaddjestudeanttaide. Oahpahusas šaddet guokte árbevirolaš sámemusihkkakonferánssa Guovdageainnus.

Prošeakta galgá maiddai ovddidit sámemusihkkáriidda digitála deaivvadanbáiki, sámemusihkkapedagogihka ja sámemusihkkajoavkko álggaheapmi almmolaš doarjagiin.

Musihkkaakademiija fierpmádagas leat Sámi oahpahusguovddáš ja Ohcejoga gielda suomabeale, ja Sámi allaskuvla Norggabeale mielde. Prošeavtta lea ruhtadan Interreg Nord Sápmi, Lappi lihttu, Tromssa fylkkasuohkan, Sámi allaskuvla, Davvikalohta-ráđđi ja Ohcejoga gielda. Prošeakta-hoavda lea Kati Eriksen ja sus oaččut lassidieđuid. Su oaččut ságaide maila bokte Kati.eriksen@utsjoki.fi dahje telefovnnas, +358 40 594 5960.

Sámi musihkkaakademiija

Govva montage: Nils Johan Eira