Permišuvdna oahpus

Permišuvnna sáhttá dárbbahit máŋgga siva geažil, ovdamearkka dihtii buozanvuođa, máná oažžuma dahje militearabálvalusa geažil.

Permišuvdna oahpus
Lea vejolaš ohcat permišuvnna oahpus jus don man nu sivas hehttejuvvot oassálastimis ohppui, ovdamearkka dihti máná oažžuma, buozanvuođa ja militeara geažil. Sáhtát maid ohcat permišuvnna beassat čađahit osiid oahpus eará báikkis. 

Universitehta- ja allaskuvlaláhka dadjá čuovvovaččat permišuvdnavuoigatvuođaid birra:

Riegádahttinpermišuvdna: § 4-3 d. (2) vuođul lea studeanttas vuoigatvuohta oažžut riegádahttinpermišuvnna máná oažžuma ja dikšuma geažil. Maŋŋel permišuvnna lea studeanttas vuoigatvuohta joatkit oahpuin seamma dásis go lei ovdal permišuvnna. Oahppoásahus galgá láhčit dili nu ahte studeanttat geat leat mánnáoažžunpermišuvnnas sáhttet joatkit oahpuin nu jođánit go vejolaš maŋŋel permišuvnna. 

Eará permišuvnnat:  § 4-3 e. mielde lea studeanttain vuoigatvuohta oažžut permišuvnna oahpus militeara bálvalusa geažil (gč. suodjalusalága §17), luohttámušdoaimmaid geažil studeantapolitihkalaš orgánain, dahje eará earenoamáš ákkaid geažil. Studeanttaide galgá juolluduvvot permišuvdna nu guhka go dárbu lea.

Permišuvdnaáigodagas leat studeanttas ain studeantavuoigatvuođat ja vuoigatvuohta váldit eksámena.

Danin go buot oahput eai lágiduvvo jeavddalaččat, sáhttá muhtin oktavuođain leat hástaleaddji sáhttit joatkkit oahpuin njuolga maŋŋel permišuvnna. Danin ávžžuhit váldit oktavuođa oahppohálddahusain ovdal ozat permišuvnna, vai sáhtit plánet viidáset progrešuvnna ja beassat čielggadit makkár váikkuhusat permišuvnnas leat du progrešuvdnii. 

Studeanta sáhttá ohcat permišuvnna olles lohkanbadjái, dahje muhtin oassái lohkanbajis.

Oahppovuoigatvuođa guhkideapmi

Du oahppovuoigatvuohta guhkiduvvo seamma guhká go don leat permišuvnnas. Dat gusto maiddái jus don válljet máksit lohkanbadjedivvaga, registreret iežat studeantan, čuovvut oahpahusa ja váldit eksámena.

Jus dus leat eksámenat mat leat báhcán gaskii, ja dus lea vuoigatvuohta čađahit maŋiduvvon dahje gearduneksámena de guhkiduvvo maiddái áigi (gč. Sámi allaskuvlla eksámen- ja loahpalaš árvvoštallama láhkaásahusa §7-4) go dus lea vejolašvuohta dieđihit iežat eksámenii seamma guhka go permišuvdna bistá.

Go áiggut ohcat permišuvnna, de deavddát skovi mas muitalat earret eará makkár áigodahkii ohcat permišuvnna ja muitalat manne ozat permišuvnna. Bija vejolaš duođaštusaid mielddusin.