PED 602 Bagadallanpedagogihkka 1

• Oahpahusgiella: Oahpahus lea davvisámegillii. Vurdojuvvo ahte studeanttat bastet lohkat dáro-, ruoŧa- ja eaŋgalasgielat lohkanmeari. 
• Oahpu lágideapmi: Oahppu lea neahttavuđot oasseáiggeoahppu. Oahpus leat guokte neahttadeaivvadeami: oahpu álggus ja oahpu loahpas. 
• 15 oahppočuoggá
• Oahppoplána
• Lohkanmearri
• Diibmoplána/deaivvadanplána: TimeEdit
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Bagadallanpedagogihka oahppu addá formála gelbbolašvuođa bagadallat iežas suorggis, nugo vuođđoskuvlaoahpaheaddjeoahpu, mánáidgárdeoahpaheaddjeoahpu, praktihkalaš pedagogalaš oahpu, joatkkaskuvlla easka álgi oahpaheddjiid ja joatkkaskuvlla hárjehallama oahpaheaddjestudeanttaid ja eará oktavuođain nugo organisašuvdna- ja skuvlaovdánahttima oktavuođain.

Oahpu ulbmilin lea gieđahallat fáttáid dan birra mo bagadallat oahpaheaddjestudeanttaid, easka álgi oahpaheddjiid ja earáid geat dárbbašit bagadallama oahppoásahusain ja eará organisašuvnnain. 

Oahppu sisttisdoallá teorehtalaš láidehusa bagadallamii, vuorrováikkuhusmáhttui ja oahppan- ja ovdánahttinproseassaide. Bagadallanpedagogihkka guovddáš sisdoallu lea iežas bagadallangeavadiid geahččaleapmi ja ovdánahttin teoriijaid vehkiin. Iežas ja earáid vásáhusaid birra ságastallo ovttas. Oahppu sisttisdoallá maid geavatlaš hárjehusaid ja teoriija ja praksisa suokkardallama čálalaččat ja njálmmálaččat pensuma vehkiin. 

Studeanta searvá aktiivvalaččat deaivvademiide, neahttaoahpahussii ja kollokviejoavkobargguide. Dát oahppoovttadat čatnasa iešguđetlágan fáttáide, main bagadallanteorehtalaš čuolmmat čatnet oktii bagadallanmetodalaš gažaldagaid.

Sisdoallu lea juhkkon guovtti váldofáddái: 

Fáddá 1: Láidehus bagadallamii
• Bagadallama vuođđodoahpagat
• Bagadallama teoriijat ja metodat
• Gulahallan ja ovttasdoaibman
• Bagadallanságastallamiid sisdoallu ja čađaheapmi 
• Etihkka, váldi ja kontrolla
• Sámi sisdoalut ja skuvllaid ja mánáidgárddiid servodatmandáhtta

Fáddá 2: Bagadallan hárjehallamis ja oahppoásahusain ja eará organisašuvnnain 
Maid mearkkaša leat hárjehallanoahpaheaddji ja kollega:
• Hárjehallanoahpaheaddji gáibádusat ja doaimmat ja dasa gullevaš dokumeanttat
• Kollegaid bagadallan 
• Oahpaheaddjestudeanttaid profešuvdnamáhtu ja profešuvdnaidentitehta ovdánahttin 
• Bagadallan ja árvvoštallan 
• Didaktihkalaš analysa bagadallama vuođđodoaibman
• Mánáidgárddit ja skuvllat oahppoarenan.

Oahppokoordináhtor:

Rauna Rahko-Ravantti: raunarr@samas.no