Govven: Ánne Kátjá Gaup/Johtti Productions

Suoidnemánu 12. beaivi 2021

Oahppojagi 2021/22 álgin

Oahppojagi álgin lea Diehtosiiddas 

Studeanttat universitehtain ja allaskuvllain eai dárbbat šat doalahit mehtera gaskka oahpahusas oahppojagi álgima rájes 2021 čavčča.

Dálá njuolggadusaid mielde lea universitehtain ja allaskuvllain vejolaš čađahit fysalaš oahpahusa ja doaluid njoammuneastadan njuolggadusaid ja rávvagiid siskkobealde. Geahča eanet dieđuid FHI neahttasiiddus ja ráđđehusa gustovaš njuolggadusaid dáppe.  

Mii leat ráhkkanan čađahit oahppojagi ja álggahanvahkku fysalaččat Diehtosiiddas borgemánu 16. beaivvi rájes, ja campus lea rabas sihke min studeanttaide ja bargiide.  

Ráđđehus ávžžuha ain álbmoga čuovvut gustovaš njoammuneastadan doaibmabijuid:
1. Biso ruovttus jus leat buohcci ja váldde iskosa jus leat korona dávdamearkkat.
2. Muitit giehta – ja gossanráinnasvuođa. Basa dávjá gieđaid dahje geavat giehtasprihta jus ii leat čáhci.

 
Jus dilli rievdá 
Mii dárkkistit geažos áiggi gustovaš njoammuneastadeami njuolggadusaid vai lágideamit sáhttet čađahuvvot oadjebas lági mielde. Mii leat maiddái ráhkkanan dasa ahte dilli sáhttá čakčii rievdat, ja leat gergosat lágidit oahpahusa ja doaluid gustovaš njuolggadusaid mielde. Eanet dieđut bohtet ain dárbbu mielde. 

Oahpahus 
Oahpahus čađahuvvo nu go lea oahppoplánaide biddjojuvvon. 
TimeEdit:as sáhtát oaidnit goas iešguđet oahput álget, movt oahpahus čađahuvvo, goas leat deaivvadeamit, eksámenbeaivvit, hárjehallan jnv.: TimeEdit Samisk Høgskole - Sámi allaskuvla 

Jus leat gažaldagat oahpahusa birra de sáhtát váldit oktavuođa oahpu koordináhtorin. 

Álggahanvahkku 
Geahča sierra prográmma dáppe:  Álggahanvahkku 2021   

Dárbbašat go koronaboahku?
Studeanttat Guovdageainnu suohkanis geat leat álbmotregistrerejuvvon eará suohkanis, ožžot fálaldaga váldit koronaboahku jus ieža háliidit váldit boahku. 

Studeanttat geat háliidit váldit koronaboahku galget váldit oktavuođa suohkana vaksinkoordináhtoriin gaskal dii. 10:00 - 14:00 bargobeiviid: +47 485 00 784. Jus eai vástit go riŋget, de sii riŋgejit ruovttoluotta nu jođánit go vejolaš. 

Sáhtát digitálalaččat diŋgot áiggi HelseNorge siiddu bokte dahje riŋget boahkuhantelefovdnii: +47 485 00 784.

Váldde oktavuođa

Jus it gávnna vástádusa du gažaldahkii dahje dárbbašat veahki mas nu, de áinnas váldde oktavuođa Sámi allaskuvlla oahppohálddahusain oahppohalddahus@samas.no / +47 78 44 84 00.