VDUO-6002 Duodji 2 joatkkaoahppun vuođđoskuvlaoahpaheddjiide

• Oahppu lágiduvvo neahttadoarjjaoahpahussan: Oassi oahpus lágiduvvo fysalaš deaivvadeapmin Sámi allaskuvllas, ja oassi neahttadeaivvadeapmin ja neahttaoahpahussán. 
• Oahpahusgiella: Davvisámegiella
• 30 oahppočuoggá
• Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain, oahppohalddahus@samas.no

Duodji 2 - oahppu fállá dieđuid árktalaš eamiálbmogiid duddjomis ja hábmemis dasa lassin oahpásnuhttá daidda gullevaš teknihkaide, reaidduide ja ávdnasiidda mat leat relevántta vuođđoskuvlla duodjefágii. Oahpahusas digaštallat árktalaš eamiálbmogiid duodjeárbevieru sajádaga globála bistevašvuođa diskurssas ja suokkardit duoji suvdilisvuođa. Oahpus hásttuhuvvo gávdnat duddjonvugiid, maiguin sáhttá váikkuhit birrasii, kultuvrii ja ekonomiijai.

Oahpahus galgá čielggasmahttit fágadidákttalaš geahčastaga ja fágii gullevaš dutkama, sámi ja álgoálbmot geahččanguovllus.

Fágas deattuhuvvo estehtalaš vásáhusat, suokkardallamat, gulahallamat ja ovdanbuktimat. 

Gáibádusat beassat eksámenii: 

Čuovvovaš gáibádusat leat eaktun beassat eksámenii:

• Oassálastit 80% lágiduvvon oahpahussii deaivvademiin ja neahttaoahpahusas.
• Čađahit didákttalaš- ja oahpahusbarggu skuvllas
• Čađahit duodjebargguid njealji duodjefáttás. Bargguide gullá duddjon ja duddjonproseassa dokumenteren, ee. dokumenteret ávdnasiid, bargoreaidduid, duodjedoahpagiid ja duddjonproseassa. Bargui gullá maiddái iežas reflekteren. Čálalaš bargu galgá leat gaskkal 5-10 siiddu, oktan govaiguin ja gáldolisttuin.
• Čađahit ovtta didákttalaš čálalaš barggu. Bargu galgá leat gaskkal 2-4 siiddu, earret mildosiid.

Eksámen: 

Eksámenis leat guokte oasi:

1. Čájehanmáhppaeksámen bargogáibádusaid vuođul. (70 % deaddu loahpalaš árvosánis).

2. Praktihkalaš eksámen gos studeanta cegge čájáhusa ovttas earáiguin ja ovdanbuktá oktagaslaččat iežas duodjebargguid (30 % deaddu loahpalaš árvosánis).